'உப்பு தேவையான அளவு' என்று 

எளிதில் ஒரு சமையல் குறிப்பை

சொல்லி முடித்துச் செல்கிறாய் நீ.

அந்த தேவையான அளவிலிருந்து 

ஒரு சமையலை

செய்யத் தொடங்குகிறேன் நான். 

 ஒரு நெல் நாத்தை நடுவதற்கு முன்

அதை 

நாத்தங்கால் மண்ணிலிருந்து 

வேறோடு பிடுங்கி

வெளியில் எடுக்க வேண்டும்.

பின் அதன் பச்சை மயிரைப் பற்றி

அதே நாத்தங்கால் நீரில்

முக்கிமுக்கி எடுக்க வேண்டும்

தந்த நிறத்தில் 

அதன் வேர்கள் பளிச்சிடும் வரை.

ஜம்பு நார் கொண்டு கட்டிய

கட்டுகளை

மூங்கில் கூடைகளில்

தண்ணீர் வடிய தலைமேல் சுமந்துச் சென்று

நடவு செய்ய 

நீர் நிறைந்த நிலத்தின் மேல்

சீரான இடைவெளியில் 

ஆங்காங்கே வீச வேண்டும்.

நார் பிரித்து கட்டவிழ்த்து

உன் விரலிடையில் சில நாத்தெடுத்து

மகவின் வாயில் 

அன்னமிடும் அன்னையென

புளித்த சேற்றினுள் 

பச்சைப்பயிர்களை ஊட்ட வேண்டும்.

இனி அதன்பாடு!

அவன்பாடு!